Euskal selekzioa eta Valentziakoa elkarrekin Oiartzunen

EUSKAL PILOTA SELEKZIOA vs VALENTZIAR PILOTA SELEKZIOA OIARTZUNEN

Joan dan asteburuan Oiartzungo Madalensoro Plazan Euskal Pilota Selekzioak Valentziar selekzioaren aurka jokatu du Llargues, Joko Internazionala, Wall-Ball eta Pasaka espezialitateetan.

Larunbata egun guztian eta igande goizean lagun arteko txapelketa jokatu zuten Euskal Pilota Selekzioak eta Valentziar Pilota Selekzioak. Emakumezko eta Gizonezkoetan aritu ziran Llargues, Joko Internazionala, Wall-Ball eta Pasakan.

Topaketa horen helburua izan da:

  • Bi federazioen arteko harremanak are gehiago sendotzea.
  • Llargues-eko, Joko Internazionaleko, Wall-Balle-eko eta Pasakako espezialitateetako gizonezko eta emakumezko txapelketa bat jokatzea.
  • Kepa Arroitajauregi Egaña, EEPF-ko presidente orde eta CIJB-ko Zuzendaritza Batzordeko kidea zenari omenaldia egitea.

EPEko hiru kidek izan dute aukera bertan parte hartzeko; Suberri elkarteko Miren Larrarte eta Leire Galdos eta Plaza emakumeak elkarteko Alaitz Badiola

Valentziako komunikabideetan.

Internazonala, Oiartzunen

internazionala

EPEko hiru kidek (Leire Galdos eta Miren Larrarte SuBerri klubetik; eta Alaitz Badiola Plazaemakumeak klubetik) Internazionala modalitateko aukeraketa entrenamenduetan parte hartu dutenez, bertara hurreratu ginen entrenatzaile lanetan dabilen Joxe Mari Mitxelena oiartzuarra elkarrizketatzera. Hark eman zizkigun azalpenei esker Internazionala modalitatea zer den ulertu ahal izan genuen.

Herrialde bakoitzean izen ezberdin batekin deitzen zaionez, elkar ulertze aldera “Internazionala” izena jarri zioten jokamolde honi. Euskal Herrian, esaterako, aldaera bat zuen: mahai jokoan aritzen ziren, alde bakoitzeko jokalari batek sakea mahaitxo baten gainean eginez abiarazten baitzuen jokua.

Modalitate hau joko zuzenekoa da: pilotariek aurkariaren joko-eremura bidali behar dute pilota, eta aurkariaren joko-eremuaren barruan egin behar du punpa. Lau jokalari dira alde bakoitzean, eta ezker pareta ez bezala (banakakoa edo binakakoa izan ohi dena) taldekako kirola da. Indarrak garrantzia du, noski, baina batez ere oso joku tekniko eta estrategikoa da. Erdian ez dago sarerik, nahiz eta joan-etorriko jokua den. Puntuaketa tenisaren antzekoa da, eta jokoa kintzetan banatzen da.

Pilota zuzenean datorrenez indar handiagoz etortzen da, eta zailagoa da kontrolatzea. Izan ere, ezker paretako modalitatean (gurean ohikoena) errebotez dator pilota eta, beraz, indarra eta abiadura galtzen du.

Uztailean modalitate honetako topaketa egingo da Oiartzunen. Valentziari esker ona erakutsi nahi dio Euskal Herriko selekzioak, ofizialtasunerako bidean egindako aurrerapausuengatik. Izan ere, CIJB munduko esku pilota elkarterik zaharrena da, eta Euskal Herria bertako partaide da. Espainia bezala jokatzen zutenak valentziarrak ziren, baina Valentziako jokalariek uko egin zioten Espainiaren ordezkari bezala jokatzeari. Horregatik, orain pilotari euskaldunek Euskal Herria ordezkatuz jokatzen dute, 2016az geroztik.

Miren Larrarte Gipuzkoako txapelduna lauterdian eskuz

Donostian. Ibaetako frontoiak jokatu ziren bi partidak 19:00etan hasita, jubenilak lehenik, eta nagusiak ondoren.

Eskuz banaka lau t’erdian, emakumezkoak, nagusiak:
IZURUN-Arrate Bergara  20-22  SU-BERRI-Miren Larrarte.

Partidu gogorra jokatu zuten biak. Miren Larrartek haseran asmatu zuen baina gero akats tonto batzuen ondoren Arratek aurrea hartu zion 20 tanturarte.

2021. Estatuko Frontball finalak Agoitzen

Miriam Arrillaga 2.Sailkatua 2021ean

Gaur goizean jokatu dira Agoitzeko frontoian Espainiako frontball txapelketako finalak. Bertan, emakumezkoen senior kategorian, EPEko kide eta SuBerri klubeko pilotaria den Miriam Arrillagak jokatu du. Bere aurkaria Iera Agirre leitzarra izan da. Final borrokatua jokatu dute. Lehenengo jokoa galdu du Arrillagak, baina bigarrenean buelta eman eta hirugarren joko bat behartu du. Azken joko definitiboan, hala ere, Arrillagak ezin izan du txapela bereganatu. Dena dela, harro egoteko moduko txapelketa jokatu du, eta finalean ere lanak eman dizkio Agirreri.

Finalerako bidean geratu dira EPEko beste pilotari batzuk ere. Miren Larrartek (SuBerri klubeko kidea) 21urtez azpiko txapelketan parte hartu du, txapelduna izan zen Salsamendiren kontra galdu zuen. Itsaso Erasunek (SuBerri kluba) finalerdia galdu zuen txapeldun geratu den Iera Agirreren kontra.
Beraz, Espainiako Frontball txapelketan ere EPEko kideek bikain ordezkatu dituzte beraien klubak, maila ona eta emaitza txukunak eskuratuz.

Emakume Master Cup binakako txapelketaren finala

2020ko abenduaren 20an Arrigorriagako frontoian jokatu zen Emakume Master Cup binakako txapelketaren finala. Bertan jokatu zuen EPEko pilotaria den Patri Espinarrek, Naroa Agirrerekin bikotea osatuz, eta 22-15 galdu zuten Amaia Aldaik eta Ohiana Orbegozok osatutako bikotearen aurka. Emaitza gorabehera, Espinarrek demostratu du oraindik ere goi-mailan aritzeko moduan dagoela, eta pilotari gogorra dela. Izan ere, eskuak txikituta zeuzkan finala hasi zenetik eta, hala ere, ez zuen bukaerara arte amore eman. Lehenengo tantoetan aurre hartu zuten, baina segituan nabaritu zen Espinarren eskuin eskua oso gaizki zegoela. Ezin zuen pilota gogor kolpatu, eta ahal bezala eutsi zion. Bere atzelari Naroa Agirreren segurtasunak partidan sartuta egotea eragin dio bikoteari, eta galdu arren, partida ona egin dute.

Aldairen eta Orbegozoren jokoak gora egin zuen nabarmen. Partida hasieran oso ondo hasi ez baziren ere, Aldai jokoan sartu ahala, abiadura eman zion pilotari eta tantoak dominatu zituzten. Orbegozok oso lan txukuna egin zuen atzean, gutxi huts eginez eta zuloak tapatuz.

Txapelik lortu ez arren, EPE taldearentzat ohore handi bat da Patri Espinar bezalako pilotari bat elkarteko partaide izatea, maila horretan aritzea eta finaletan ikusgarritasuna izatea.

Geuria.eus en finalari buruzko azalpen gehiago irakurgai HEMEN

https://www.youtube.com/embed/TzC7mzp56i0

 

Patri Espinar Berrian; Maite dut maite,Ascensiones

Patri Espinar; ascensiones
Arg. Jon Urbe

 

 

Artikulua BERRIA egunkarian argitaratu zen 2020. irailaren 4 ean.

Berrian irakurri.

«Catherine Destivelle erreferente bat da»

Esku pilotan txapelduna da Patri Espinar, baina mendia du bizibide: mendi gidaria da, besteak beste. Catherine Destivelle alpinista eta eskalatzailea du eredu, eta haren ‘Ascensions’ liburua gustatzen zaio.

Kirolari petoa da Patri Espinar (Galdakao, Bizkaia, 1985): pilotaria izateaz gain, alpinismoa eta eskalada ere jorratzen ditu. Bere afizio eta ofizio nagusian, kirolean, Catherine Destivelle alpinista eta eskalatzaile frantsesa du eredu. Hark 2003an idatzitako Ascensions liburua irakurtzeko gogoa zuen, eta bi egunean «irentsi» berri du.

Zergatik duzu gogoko Catherine Destivellen Ascensions liburua?

Gustura irakurri dut, Catherine Destivelle erreferente bat izan delako emakumezkoen alpinismoan eta eskaladan 1980ko hamarkadatik aurrera. Munduko eskalatzailerik hoberena izan da, eta niretzat beti izan da erreferente eta aitzindari bat eskaladaren munduan, eta emakumeen artean.

Nor da Catherine Destivelle zuretzat?

Erreferente bat eskaladan eta alpinismoan, eta emakume eskalatzaileen aitzindaria. Lehenbizikoa izan zen gauza ikaragarri zailak egiten. Munduko eskalatzailerik hoberena izateaz gain, kristoren igoerak egin ditu bakarka, eta bide berriak ireki. Ikaragarria izan da lortu duena.

Garrantzitsua da bizitzan erreferenteak izatea?

Bai horixe. Kirol munduan eta gainontzeko arloetan erreferenteak izatea garrantzitsua da horien ondoren datozenentzat. Horrela, baduzu nori erreparatu, ikusten duzu badabilela jendea horretan, eta ez zarela bakarra. Horrelako pertsonak eredu gisa hartzea ezinbestekoa da bide berriak zabaltzeko.

Antzekotasunik ikusten duzu Catherine Destivellen eta zure artean?

Aspektu batzuetan identifikatuta sentitu naiz harekin. Adibidez, bere momenturik gorenean zegoenean, ez zitzaion fama gehiegi gustatzen: ez zen eroso sentitzen protagonista izaten. Nik ere askotan sentitu dut hori. Badakizu erreferenteak sortzeko beharrezkoa dela hor egotea, baina niri telebistaren mundua ez zait gehiegi gustatzen: kontraesana sortzen du neure barruan, eta hari ere gauza bera gertatzen zitzaion.

Mendiak egin zuen ezagun Destivelle. Zein harreman duzu zuk mendiarekin?

Kirola beharrezkoa dut bizitzeko, eta berdina gertatzen zait mendiarekin eta naturarekin. Konfinamenduan are gehiago baieztatu nuen horrela dela. Mendian egiten diren jarduerak maite ditut: ez dago lehiarik, bizipen ederrak baizik. Horrek asko betetzen nau, eta askotan bilatzen dut mendian ibiltzea eta naturan egotea.

Mendia ere lantoki duzu?

Bai. Mendi gidaria naiz, eta emakumeentzat mendi orientazio ikastaroak eta eskaladakoak ematen ditut. Aurten proiektu berri bat sortu dut, eta mendizaletasunarekin du lotura: teknika bertikalak, korapiloak, sokak, tirolina eta biziraupena uztartzen ditu, naturan. Emozioei eta sentimenduei garrantzia ematen diegu, eta ikusten dugu nola ahalduntzen garen mendian ekintza horiek egiten, baita gure beldurrei nola aurre egiten diegun ere.

Non zaude erosoago: frontoian ala mendian?

Ni bi toki horietan oso eroso sentitzen naiz, eta bietan ditut oso bizipen politak.

Oztoporik izan duzu esku pilotan emakume izateagatik?

Lehen oztopoa zen nire herrian neska pilotari bakarra nintzela. Emakumeentzako lehiaketarik ez dagoela ikusten duzu gero, esaten dutelako ez dagoela emakumerik. Gero ikusi dugu emakumeak bazeudela, baina ez dutela emakumeen esku pilota bultzatzen. Nerabezaroan neska gehienek kirola utzi egiten zuten. Gaur egun, emakumeen esku pilota egituratzen ari gara, baina gizonengandik oso urrun gaude. Oraindik oztopo asko ditugu. Poliki-poliki goaz aurrera, baina lan handia dago egiteko.

Kirolak zuri zer ematen dizu?

Laguntzen nau neure burua ezagutzen, nire mugak esploratzen, konfiantza hartzen, ahalduntzen, pertsona hobea izaten, eta lagun asko eman dizkit. Bestalde, lagundu dit Euskal Herri osoa ezagutzen, eta euskara eta euskal kultura barneratzen.

Eta zer kendu dizu?

Osasuna, askotan, lesioengatik. Eta injustiziak pairatzen ditudanean, sufrimendua ere ekarri dit. Emakume pilotarien elkarteko lehendakari moduan nire pilotarien baldintzak hobetu nahi izan ditudalako, askotan, enpresari batzuek nire aurka jo dute txapelketa batzuetatik kanpo uzten. Injustizia horiek batzuetan motibazioa kentzen dute, baina orokorrean, ez dit gauza askorik kendu: gehiago da ematen didana.

Zein da zure ametsa?

Txikitan pilotari profesionala izatea zen nire ametsa: hori ez dut lortu, eta ez dut lortuko. Baina amesten ez nuen zerbait lortu dut: esku pilotako nazioarteko txapelketa bat bi aldiz irabaztea eta munduko pilotari hoberenaren saria jasotzea.

Joxpinixi,aurreneko emakume pilotaria, Lazkaotarra

http://www.kutxateka.eus.     Eibarko pilotalekuan 79 urte zituela.

Josefa Ignacia Albisu Aranburu Lazkaon jaio zen 1859ko martxoak 19an eta Donostian zendu zen 1950ko otsailaren 4ean. Bera izan da Euskal herriko lehendabiziko emakume pilotaria. Pelotaria bezela 1885ko martxoaren 8an ezaguna izaten hasi zela esan daiteke, desapiyo handi baten ondorioz hain zuzen ere.

Hona hemen bere historioa…

Errebotean ere bagara pilotari: Miriam Arrillaga

Pilotaren hainbat modalitateren artekoa da errebotea. Plaza luzean jokatzen da lau edo bost laguneko talde bi alde banatan jarrita. Sakea esku hutsez egiten da; jokoa, aldiz, eskularruz edo xisteraz.

Modalitate honetan ere gizonak nagusitu arren eta ikusgarritasun osoa bereganatu badute ere, zalantzarik ez da emakumeek beti jokatu izan dutela errebotean, aisialdian eta erdi-ezkutuan izan bada ere. Azken hamarkadetako lan eskergari esker, emakumeak zuriz jantzita frontoian ikustea jada ez zaigu arrotza, eta bazterrekoa izaten jarraitzen badu ere, gero eta ohikoagoa da. Dena dela, pilota modalitate bakarra ari da gailentzen (fenomeno hau emakumeetan bezala gizonezkoetan ere gertatzen da): ezker hormako esku pilota, hain zuzen ere. Ez da ahaztu behar beste hamaika modu ere badaudela pilotan jokatzeko, eta bazterrean dauden modalitateei bultzada ematea ere bada Emakumeen Pilotarien Elkartearen (EPE) xedea.

Errebotea-Sakea

Errebotea baztertuta dagoen modalitatea da, are gehiago emakumeentzat.

Baina hala ere, Miriam Arrillagak, 2016ko apirilaren 10ean jokatu zuen lehenengo partida ofiziala, Euskal Herriko txapelketan jubenil mailako lehiaketan. Aurtengo 2020ko uztailaren 31an berriz Zubietako pilota plazara salto egiten zuen galtza zuriak jantzita, eta bere lau taldekideekin batera 13-8ko emaitzaz gailendu zen. EPEko kide den Arrillagak lehenengo pausua eman duela esan daiteke: alde batetik, emakumeek errebotean jokatzeari ikusgarritasuna eman dio; eta bestetik, errebotea bezalako modalitate bati hauspo pixka bat emango dio, lehen emakumea izateagatik lortu behar lukeen oihartzuna medio.

EPEk babes osoa helarazten dio bai Arrillagari eta baita modalitate honen bultzatzaileei ere, bazterreko modalitateak erdira ekarri eta bazterreratutako emakumeek modalitate guztietan merezi duten parte hartzea eta ikusgarritasuna lortzeko bidean lehenengo pausuetako bat emateagatik.

AZPEITIA. EMAKUME PILOTARIEN ELKARTEAREN (EPE) II. ASANBLADA

Joan den uztailaren 18an Azpeitiko Emakumeen Txokoan egin genuen Emakume Pilotarien Elkartearen (EPE) urteko batzar orokorra. Aurrez, zuzendaritza batzordeak bidalitako dokumentu eta gai-ordena aztertuta joan ginen bilerara, modu horretan informazio osoa era gardenean jasota.

Azpeitian 30 bat kide elkartu ginen. Bizi dugun egoera aintzat hartuta, aurrez prestatu genuen lekua aulkien arteko distantziak gorde ahal izateko. Horrez gain, bestelako osasun-neurriak ere hartu genituen: uneoro maskarekin, eskuak garbituz, distantziak gordez eta bilera bukatzerakoan erabilitako espazioa desinfektatuz. Herritar guztioi dagokigu erantzukizunez jokatzea eta, hargatik, EPEko kideok ere gure gain hartu genuen ardura hori.

10:30etan elkartu ginen Emakumeen Txokoko atarian. Udako giro eguzkitsua eta sanoa, aldartean ere nabari zitzaigun. Berriz elkartzeko gogoz ginen. Bilera oso ondo joan zen, giro onean eta jende askoren parte hartze aktiboarekin. Hainbat erabaki hartu genituen, horien artean, EPEren norabide aldaketa eta zuzendaritza batzorde berria. Indarberrituta eta animo handiz bukatu genuen bilera, aurrera jarraitzeko gogoz eta, ziurrenik, duela urtebete EPE eratu zenean baino sendoago, koherenteago eta argiago. Bukatzean, talde argazkia atera genuen, gure indarraren eta batasunaren adierazgarri.

Eguna, ostera, ez zen hor bukatu. Handik bazkaltzera joan ginen, aspaldi frontoian egindako lagunekin zein EPEren bitartez ezagutu dugun jendearekin. Izan ere, hori ere bada gure helburua: pilotariek elkar ezagutzea, saretzea, bat egitea. Emakumeen pilota pilotarien beraien ekimenez bultzatzea, pilotariok eta emakumeok izan gaitezen onuradun nagusiak. Hartara, paraleloki, gizarte osoaren onuran eta mundu hobe baten eraikuntzan.