Euskal selekzioa eta Valentziakoa elkarrekin Oiartzunen

EUSKAL PILOTA SELEKZIOA vs VALENTZIAR PILOTA SELEKZIOA OIARTZUNEN

Joan dan asteburuan Oiartzungo Madalensoro Plazan Euskal Pilota Selekzioak Valentziar selekzioaren aurka jokatu du Llargues, Joko Internazionala, Wall-Ball eta Pasaka espezialitateetan.

Larunbata egun guztian eta igande goizean lagun arteko txapelketa jokatu zuten Euskal Pilota Selekzioak eta Valentziar Pilota Selekzioak. Emakumezko eta Gizonezkoetan aritu ziran Llargues, Joko Internazionala, Wall-Ball eta Pasakan.

Topaketa horen helburua izan da:

  • Bi federazioen arteko harremanak are gehiago sendotzea.
  • Llargues-eko, Joko Internazionaleko, Wall-Balle-eko eta Pasakako espezialitateetako gizonezko eta emakumezko txapelketa bat jokatzea.
  • Kepa Arroitajauregi Egaña, EEPF-ko presidente orde eta CIJB-ko Zuzendaritza Batzordeko kidea zenari omenaldia egitea.

EPEko hiru kidek izan dute aukera bertan parte hartzeko; Suberri elkarteko Miren Larrarte eta Leire Galdos eta Plaza emakumeak elkarteko Alaitz Badiola

Valentziako komunikabideetan.

Miren Larrarte Gipuzkoako txapelduna lauterdian eskuz

Donostian. Ibaetako frontoiak jokatu ziren bi partidak 19:00etan hasita, jubenilak lehenik, eta nagusiak ondoren.

Eskuz banaka lau t’erdian, emakumezkoak, nagusiak:
IZURUN-Arrate Bergara  20-22  SU-BERRI-Miren Larrarte.

Partidu gogorra jokatu zuten biak. Miren Larrartek haseran asmatu zuen baina gero akats tonto batzuen ondoren Arratek aurrea hartu zion 20 tanturarte.

Emakume pilotariek dagokien lekua izan nahi dute Donostian

Hirutxuloko Hitzatik jasota

Emakume Pilotarien Elkarteak (EPE) Eliteko Emakume Pilotarien Donostia Saria sortzeko eskatu dio udalari, eta proposamena gaur bertan erregistratu dute. Egitasmoa aurkezteko, prentsaurrekoa egin dute EPEko Garbiñe Tijero, Maider Mendizabal eta Leire Galdos kideek, eta azaldu dute “emakume pilotariak ikusgarri egin” nahi dituztela, hirian “dagokien lekua” izan dezaten. Tijero eta Mendizabal pilotari beteranoak dira, eta Galdos 20 urteko pilotari gaztea, aurreko bien arabera, “etorkizun handikoa”. Eskaera erregistratzeaz gain, EPE-k hitzordu bat eskatu du Martin Ibabe Kiroletako zinegotziarekin. EH Bilduk proposamena babestu du, eta Reyes Carrere zinegotzi eta bozeramailea prentsaurrekoan egon da; nabarmendu du EPE-ren proposamenak “emakume kirolarien duintasuna” aldarrikatuko duela.

Emakume Pilotarien Donostia Saria asteburu bateko txapelketa azkarra izango litzateke, eta EPE-ren ustez, Donostia leku “oso egokia” da antolatzeko. Izan ere, hirian beti “pilota tradizio handia” egon dela nabarmendu dute, eta hainbat mugarri historiko azpimarratu ditu Mendizabalek: “1990ean, Intxaurrondon elkartu ziren lehenengo emakume palista federatuak entrenatzaile batekin, 2004an Gipuzkoako Euskal Pilota Federazioak Emakumea Pilotari proiektua abiatu zuen, Gipuzkoako zortzi udalerri nagusienen parte-hartzearekin, tartean, noski, Donostia. Proiektua 14 urtez egon zen funtzionamenduan, eta asko erabili ziren Donostiako instalazioak: Atano, Karmelo Balda, Gaskako trinketea, Intxaurrondoko frontoia, Altzakoa, eta abar. Gainera, Donostian aisialdirako pala ikastaroetan ia 60 emakumea biltzea lortu izan dute”.

Historian atzerago ere egin du Mendizabalek, Donostiako pilota tradizioa agerian uzteko: “XX. mendearen hasieran emakume erraketistek presentzia handia izan zuten. Gainera, erraketisten enpresa gizon garrantzitsuena donostiarra zen: Ildefonso Anabitarte puntista ohia. 1919. urtearen inguruan, erraketistek Igeldoko frontoia inauguratu zuten, eta Maria Cristina erregina egon zen. Grosen, berriz, 1938an inauguratu zen pilotalekuan erraketistentzako eskola antolatu zuten, eta Donostiako zein inguruko neskak hara joaten ziren ikastera. Era berean, lehenengo erraketista profesionalak handik atera ziren: hogei inguru atera ziren eskola hartatik, eta batek Donosti izenarekin jokatzen zuen”.

Txapelketaren nondik norakoak

“Emakume pilotarien jokoa gehiago balioetsiko den pilotalekua” erabili nahi dute txapelketa egiteko: Antiguakoa. “Atano frontoiak bezain beste xarma du, polita da eta pilota zaletasuna du. Gainera, txikiagoa denez, egokiagoa da emakumeon jokoarentzat, eta jokoa azkarragoa izango da, errebote gehiagorekin, eta abar. Emakumeon jokoaren ikusgarritasuna handiagoa izango da, eta gure gaitasuna hobeto erakutsiko dugu”, azaldu du Mendizabalek.

Izan ere, EPE-koak azaldu du azken urteotan Donostiako pilota txapelketetan emakumeak ere sartu dituztela, baina “antolatzaileak gizonezkoak direnez, ez dute emakumezkoen pilota behar bezala ezagutzen, eta gizonezkoen egituretara bideratzen dute dena. Argi dago berdintasunerako asko falta dela hemen ere bai”.

Horrela, bi modalitate izango lituzke txapelketak: eskuzko banakakoa (lau pilotari) eta gomazko palazko binakakoa (lau bikote). Eliteko jokalariak egongo lirateke, eta jokalari beteranoek zein gazteek hartuko lukete parte: Patri Espinar, Leire Etxaniz, Miren Larrarte, Miriam Arrillaga, Maider Mendizabal, Amaia Irazustabarrena, Maider Huizi eta Ariane Arrieta, esaterako. Era berean, Tijerok azpimarratu du “munduko emakumezko pilotaririk onena” ere egongo litzatekeela: Iparraldeko Maritxu Housset, hain justu.

Txapelketa Aste Nagusian jokatzea proposatu dute, baina azaldu dute koronabirusaren aurkako neurrietara egokituko liratekeela, eta iraileko Euskal Jaietan jokatzea ere aproposa irudituko litzaiekeela. Bestalde, txapelketako finalerdiak larunbatean jokatuko lirateke, eta finalak igandean. Proposamena aurrera ateratzeko itxaropentsu agertu dira, eta udalaren erantzunaren zain daude orain.

Emakume Master Cup binakako txapelketaren finala

2020ko abenduaren 20an Arrigorriagako frontoian jokatu zen Emakume Master Cup binakako txapelketaren finala. Bertan jokatu zuen EPEko pilotaria den Patri Espinarrek, Naroa Agirrerekin bikotea osatuz, eta 22-15 galdu zuten Amaia Aldaik eta Ohiana Orbegozok osatutako bikotearen aurka. Emaitza gorabehera, Espinarrek demostratu du oraindik ere goi-mailan aritzeko moduan dagoela, eta pilotari gogorra dela. Izan ere, eskuak txikituta zeuzkan finala hasi zenetik eta, hala ere, ez zuen bukaerara arte amore eman. Lehenengo tantoetan aurre hartu zuten, baina segituan nabaritu zen Espinarren eskuin eskua oso gaizki zegoela. Ezin zuen pilota gogor kolpatu, eta ahal bezala eutsi zion. Bere atzelari Naroa Agirreren segurtasunak partidan sartuta egotea eragin dio bikoteari, eta galdu arren, partida ona egin dute.

Aldairen eta Orbegozoren jokoak gora egin zuen nabarmen. Partida hasieran oso ondo hasi ez baziren ere, Aldai jokoan sartu ahala, abiadura eman zion pilotari eta tantoak dominatu zituzten. Orbegozok oso lan txukuna egin zuen atzean, gutxi huts eginez eta zuloak tapatuz.

Txapelik lortu ez arren, EPE taldearentzat ohore handi bat da Patri Espinar bezalako pilotari bat elkarteko partaide izatea, maila horretan aritzea eta finaletan ikusgarritasuna izatea.

Geuria.eus en finalari buruzko azalpen gehiago irakurgai HEMEN

https://www.youtube.com/embed/TzC7mzp56i0

 

Leire Etxaniz EPEko pilotari etxebarriarrak uko egin dio Master Cup txapelketako finalerdia jokatzeari.

Txapeldun handietan handienetakoa da Etxaniz, batez ere Master Cup-ari dagokionean, jokatutako txapelketa gehienak berak irabazi baititu: binakako hiru txapelak eta banakako bi txapel (jokatutako hiruetatik). Ezbairik gabe, txapelaren neurrira eginda dago Etxaniz.
Hala ere, pandemiak ekarri duen egoerarekin eta bere buruarekin koherente jokatu du, eta ez du laugarren txapela lortzeko aukerak itsutu. Dioenez, goizegi da oraindik, pilotariek denbora asko daramate ganoraz entrenatu gabe, eta Master Cupen arabera, bata bestearen atzetik jokatu beharko lirateke semifinala eta finala (ekainaren 26an eta 28an, hurrenez hurren). Horrez gain, osasun larrialdiak ere kezkatzen du Etxaniz, familian gertutik bizitzen ari baita Covid-19a. Horregatik, bere lehentasunak beste batzuk dira, eta koherentziaz jokatzea lehenetsi du.
Txapelketaren antolakuntzak ordezkoak bilatu ditu, baina garbiegi ez jokatu izana egotzi zaie antolatzaileei. Izan ere, orain arteko txapelduna kanpoan utzi du. Etxanizek, data horietan ez zuela jokatuko esan zion antolakuntzari (osasun larrialdia eta horrek ekarri dituen entrenamendu falta kontuan hartuta), baina berak ez dio txapelketari uko egin. Gainera, kirol testuingurua ikustea besterik ez dago: profesional zein federatuen txapelketa eta partidu guztiak bertan behera geratu dira, eta oraindik ezin da jakin noiz hasiko diren. Beraz, EPEren ustetan, honek erakusten du egitura duin baten eta ardurazko erabakien falta dagoela txapelketa honetan.
EPE elkartea lanean ari da pilotarien baldintzak hobetzeko, bai txapelketa honetan eta baita, orokorrean, pilotaren munduan ere. Egitura duin eta serio baten alde apustu egiten du elkarteak, eta federazioekin elkarlanean, hori sustatu nahi du bai txapelketa publiko zein pribatuetan. Horregatik, babes osoa azaltzen dio elkarteko kide den Leire Etxanizi, bere erabakiarekin elkartearen koherentzia mantendu duelako, emakume pilotarien baldintza onak eta gizarte osoaren segurtasuna, ardura eta kalitatezko aisialdia bermatzeko pausuak emanez. Azken batean, gure jarduna gizartearen aisialdiaren parte ere badelako, eta horregatik, kalitatezko entretenimendua sustatu nahi dugu, gure baldintzak eta erabakiak errespetatuko dituena eta, horretarako, halako osasun egoera baten aurrean arduraz jokatzea dagokigu. Horrez gain, EPEk adierazten du desadostasuna agertzen duela Master Cup txapelketak hartutako jarrerarekin, pilotarien behar eta nahiei begiratu beharrean bere probetxu eta interes propioak lehenesten ari delako.
EPEk eskua luzatzen dio elkarlanean jardun nahi duen orori, eta horrenbestez, baita Master Cup txapelketako antolatzaileei ere, guztion onurarako arituko bagara. Denoi dagokigu pilotaren egitura duina lortzeko ardura, gizon zein emakume, pilotari guztien mesedetan.

Patri Espinar: Pareta bat dagoen lekuan frontoia ikusten du

EPEko pilotaria den Patri Espinar, beste guztiok bezala, etxetik irten ezinda dago. Aspaldian ez du frontoia zapaldu, eta aspaldi ez ditu praka zuriak jantzi. Dena dela, pilota ez du ahaztu, ez du nahi bere eskuek pilota ahaztu dezaten, eta ez du frontoiko mugimenduetan erakusten duen abilezia galdu nahi. Ezinbestean, etxeko sukaldea frontoi bihurtu du Patrik. Han egiten ditu pilotako mugimenduak (espazioak uzten dionaren arabera), han lantzen ditu eskuak, eta han asetzen du, neurri batean bada ere, pilota gosea.

Patri Espinar ez da badaezpadako pilotaria. Bere palmaresean denetik dago, borroka eta lan handia eginez lortutako garaipenak, eta entrenamendu zorrotz eta serioen emaitza. Horregatik, eta bide horretatik jarraitzea helburu duela, Patrik ez ditu bere entrenamenduak alde batera utzi salbuespenezko egoera honetan, eta ahal duen bezala entrenatzen ari da.
Benetan bizi dugun zerbait barru-barruan daramagunean, edozein lekutan bilatzen ditugu hori asetzeko moduak, edozein unetan egiten ditugu loturak odolean borborka dugun horrekin. Pilotarako berezko sena dutenek frontoi bat ikusten dute pareta bat ikusten duten bakoitzean, eta Patrik, etxetik atera ezinik dagoen egunotan, sukaldean frontoia irudikatu eta piloteatzen aritzen da. Bestelako ariketekin ere tartekatzen du piloteoa, entrenamendu osoa eginez, pilota barru-barruan bizi duen eta pilotan jokatzea profesionaltasunez hartzen duen bati eskatu dakiokeen guztia. Gizarteak eta instituzioek profesionaltasunez tratatzea falta da orain, eta horretarako borrokan ari da Patri, EPEko lehendakaria, gainerako EPEkideekin batera.

Artikulua gazteleraz El CORREOko web gunean ikusi

 

EPEko pilotariak emakumezkoen torneo esanguratsuetan oso errendimendu onarekin

2019-20 denboraldi hasiera honetan, neska pilotariak mutilen antzera beraien probintzietako txapelketak jokatzen ari dira; hala nola elkarteen arteko Gipuzkoako, Arabako, Bizkaiako edota Nafarroako txapelketak, paletaz zein eskuz (egiten den probintzian). Txapelketa guzti hauetan EPEko pilotarien presentzia nabaria izaten ari da eta azken faseetara asko iritsi dira.

Lehiaketa hauetaz gain, beste torneo pribatu batzuk ere antolatzen dira neskentzat, bai eskuz eta bai palaz. Hauen artean esanguratsuenak direnetan EPEko pilotarien joko maila ona aipagarria izaten ari da.

Pasa den astelehenean aurkeztu zen Andrazkoen Larruzko Paletako II. Bizkaia Torneoa Bilbon. Guztira, maila altuenetakoa duten 8 pilotarik parte hartuko dute, lau bikotez osaturiko multzo bakar batean. Joaneko ligaxka baten ondoren, lehenengo bi sailkatuak finala jokatuko dute. Aipatu, 8 pilotari hauek EPEko kideak direla eta Euskal Erkidegoko probintzietakoak. Paleta larruz jokatzea ez da oso ohikoa nesketan baina Arabako neska federatuei ematen diete jokamolde honetan mutilekin aritzeko aukera. Bizkaian berriz saioren bat egin izan dute batzuk eta Gipuzkoan berriz zuzenean gomazko paletarekin ondoen aritzen diren pilotariak hartu dira eta jokamolde hau praktikatzen hasi dira. Ondorioz, neskak larruzko paletan oraindik beraien mailarik onenera iritsi ez diren arren, dagoeneko oso ondo moldatzen ari dira eta Bizkaia Torneoan ikuskizun polita ematea espero da. EPEko pilotari hauen nahia hauxe da, jokamolde berrira ahalik eta ondoen moldatu eta espektakulu polit zein ezberdina emanez partida onak egitea. Torneo hau abenduaren 13, 20, 27 eta urtarrilaren 4an jokatuko da. Lehenengo jardunaldia Larrabetzun eta beste guztiak Bizkaia frontoian. Finala ETB-k eskainiko du zuzenean.

Eta bestetik, egun bisibilidade eta garrantzia mediatiko gehien duen Master Cup txapelketaren inguruan esan, aurtengoan 4 maila ezberdindu direla eta igande honetan bi maila nagusienetako finalak jokatuko direla Barakaldon, eguerdiko 12:00etan (ETB1-ean zuzenean). Emakume Pilotarien Elkartetik oso oso pozik gaude bi finaletako protagonistak EPEko kideak direlako. Honek argi uzten du besteak beste zein mailatako pilotariak ditugun gure elkartearen barnean.

Alde batetik, toke erdiko finalean elkarte berdinekoak (Anoetako Su-Berri elkartea) diren bi pilotari arituko da nor baino nor: Miren Larrarte bidaniarra eta Miriam Arrillaga zubietarra.

Eta 1. mailako final handian partida handia ikusteko aukera izango da, izan ere oso oso maila oneko bi pilotari arituko baitira elkarren aurka. Bata zein bestea 4 1/2ko txapeldunak izan dira aurreko edizioetan. Leire Etxanizek 2017koa irabazi zuen eta Patri Espinarrek berriz 2018koa. Aurrez aurre bi bizkaitar, bata Etxabarrikoa (Leire) eta bestea Usansolokoa (Patri, nahiz eta honek urteak daramatzan

Gipuzkoan bizitzen). Leire eta Patri gaur egun eskuz jokatzen duten pilotarien artetik onenak direla esango genuke. Nahiz eta bi hauek txapelketa pilota

goxoarekin jokatu duten, toke erdikoarekin jokatzeko ez lukete arazo handiegirik izango. Eskuak egin, entrenatu eta ziur punta puntako pilotariak izango liratekeela toke erdiko pilotarekin ere.

Emakumezkoen eskuzko final handi honetan ikuskizuna ziurtatua dago hasiera batean eta espero dugu ikusleek disfrutatzea, pilotariek euren maila ematea eta emakumezkoen pilotak gizarte honetan lekutxo bat baduela erakustea.